9 траўня – дзень, які штогод трывожыць нашыя сэрцы, прымушае задумацца пра галоўнае – каштоўнасці свету. Праз гады не цішэе боль аб страшных падзеях Вялікай Айчыннай вайны. Пра іх мы даведаемся са старонак напісаных раманаў, з медыясюжэтаў, дакументальных фільмаў. Аднак самай каштоўнай крыніцай інфармацыі застаюцца людзі.
Напярэдадні 81-й гадавіны Перамогі савецкага народа над нямецка-фашысцкімі захопнікамі, а таксама аб’яўленым Прэзідэнтам Рэспублікі Беларусь годам Беларускай жанчыны, супрацоўнікі Інстытута Следчага камітэта на чале з намеснікам начальніка Аляксандрам Сасноўскім наведалі блакадніцу Ленінграда Ніну Фёдараўну Новак – юрыста і адваката з 40-гадовым стажам.
Ніна Фёдараўна ведае пра вайну не па чутках: зведала яе жахі і нягоды, была малалетнім вязнем, перажыла ваеннае дзяцінства на акупаванай немцамі тэрыторыі. Яна расказала, што нягледзячы на цяжкае дзяцінства, яе жыццё было насычаным, напоўненым прыемнымі падзеямі, таксама падзялілася ўспамінамі аб подзвігах бацькі. Яе бацька, Фёдар Аляксеевіч Баранаў, быў адным з кіраўнікоў антыфашысцкага падполля і партызанскага руху на тэрыторыі Баранавіцкай вобласці ў гады Вялікай Айчыннай вайны, з’яўляўся дзяржаўным партыйным дзеячам.
– Дзень Перамогі – гэта свята са слязамі на вачах. Перамога вельмі дорага каштавала беларускаму народу. Нельга забываць гераічны подзвіг салдат, каб не паўтарыць трагічныя падзеі, якія закранулі кожную сям’ю, – навучае Ніна Фёдараўна.
Афіцэры павіншавалі Ніну Фёдараўну з надыходзячым святам Вялікай Перамогі, падзякавалі за душэўную сустрэчу, тую працу і подзвіг, дзякуючы якім у нас ёсць магчымасць жыць у мірны час.
